mat puchh harf-e-dard ki tafsir kuchh bhi ho
vo ḳhvab la-javab tha ta.abir kuchh bhi ho
har naqsh ko miTa ke guzarti rahi hava
lauh-e-jahan pe vaqt ki tahrir kuchh bhi ho
behtar nahin ki tujh ko mile kaghzi libas
rangon ka imtizaj hai tasvir kuchh bhi ho
jab hukm ho gaya hai ki nala-ba-lab rahen
phir vahm kya hai zahr ki tasir kuchh bhi ho
mere liye zamin ka tasavvur hai asman
paband huun havaon ka taqdir kuchh bhi ho
maslak yahi tha shahr ki buniyad rakh chale
is se gharaz nahin hai ki ta.amir kuchh bhi ho
chhaya hua hai arz-o-sama par mira shu.ur
‘shahid’ karenge zehn ki tasḳhir kuchh bhi ho
Leave a Reply