rah-e-talab men dam-o-diram chhoḌ ja.enge
likh lo hamare sher baḌe kaam a.enge
jhuTa hai jhuuT baat ye bolega a.ina
aao hamare samne ham sach bata.enge
tanha jo apna bojh uTha.e hue hain ḳhud
mar jaa.en ham to chaar ye mil kar uTha.enge
thoḌi si be-ḳhudi ho to ham uTh ke chal paḌen
hosh-o-havas men to qadam laḌkhaḌa.enge
ham ne tumhare ba.ad jalaya nahin charagh
tum kya samajh rahe the ki ham dil jala.enge
‘aḳhtar’ ham asman pe aa to ga.e magar
aisa nahin ki apni zamin bhuul ja.enge
Leave a Reply