ajab halat hamari ho gai hai
ye duniya ab tumhari ho gai hai
sukhan mera udasi hai sar-e-sham
jo khamoshi pe taari ho gai hai
bahut hi khush hai dil apne kiye par
zamane-bhar men khvari ho gai hai
vo nazuk-lab hai ab jaane hi vaala
miri avaz bhari ho gai hai
dil ab duniya pe laanat kar ki is ki
bahut khidmat-guzari ho gai hai
yaqin maazur hai ab aur guman bhi
badi be-roz-gari ho gai hai
vo ik bad-e-shumali-rang jo thi
shamim us ki savari ho gai hai
mire paas aa ke khanjar bhonk de tu
bahut neza-guzari ho gai hai
Leave a Reply