Gauhar Hoshiyarpuri
dil tamam a.ine tiira kaun raushan kaun
ab ye aankh hi jaane doston men dushman kaun
ya jigar men ḳhuun kam tha ya abhi junun kam tha
dasht ke evaz karta varna qasd-e-gulshan kaun
ik nashat-ara.i ik sukun-e-tanha.i
hijr ya visal achchha hal kare ye uljhan kaun
silsile mohabbat ke naam se nahin chalte
apni zaat jo taj de shaiḳh kya barahman kaun
ik na.i lagan baḳhshe ik faqat thakan baḳhshe
mardum-azma nikla rahnuma ki rahzan kaun
ishq be-ḳhabar guzre ḳhair-o-shar ke uqdon se
aarzu ki siita ko raam kaun ravan kaun
ḳhama-e-suḳhanvar ya jazb-e-andrun ‘gauhar’
fan ke sar pe rakhta hai taj-e-azmat-e-fan kaun
Leave a Reply