Abbas Rizvi
jab koi tiir havadis ki kaman se aaya
naghma ik aur mire mutrib-e-jan se aaya
ek nazzare ne mere liye ankhen bhejin
dil kisi kargah-e-shisha-giran se aaya
jab bhi is dil ne tire qurb ki daulat chahi
ek saaya sa nikal kar rag-e-jan se aaya
main na darta tha anasir ki sitam-koshi se
khauf aaya to bas ik umr-e-ravan se aaya
kya karun khilat o dastar ki khvahish ki mujhe
ziist karne ka saliqa bhi ziyan se aaya
main to ik khvab ko ankhon men liye phirta tha
ye sitara mire pahlu men kahan se aaya
Leave a Reply