Talib Baghpati
haath malta hai pashiman-e-jafa mere ba.ad
ḳhair yuun baḌh ga.i tauqir-e-vafa mere ba.ad
ḳhud se mahjub hai ḳhud un ki haya mere ba.ad
husn maghmum hai ma.azur-e-ada mere ba.ad
rang la.egi miri ah-e-rasa mere ba.ad
tum mujhe yaad karoge ba-ḳhuda mere ba.ad
ho ga.e zard kaf-e-dast-e-nigarin afsos
ḳhair sarsabz to hai naḳhl-e-hina mere ba.ad
sogvari men hasinon ne baḌha.e jhule
kitni be-kaif hai savan ki faza mere ba.ad
kyuun nadamat se tah-e-ḳhak gaḌa jaata huun
tum ne kis dil se mujhe yaad kiya mere ba.ad
ab kahan hain vo lab-e-bam qamar ke jalve
un ki surat ko tarasti hai faza mere ba.ad
qabr par laa.e chaḌhane ko miri a.ina
yuun uThi mayyat-e-andaz-o-ada mere ba.ad
bhuul jaate hain vo ab roz lagana mehndi
roz pisne ko tarasti hai hina mere ba.ad
mar ke kya chain mile ab ye ḳhalish hai ‘talib’
ba-vafa ban ga.e arbab-e-jafa mere ba.ad
Leave a Reply