Zikr-E-Tahrim-E-Haram Ya Jam-E-Sahba Kuchh to Ho

Poet

zikr-e-tahrim-e-haram ya jam-e-sahba kuchh to ho

ruuh ki sho.ala-mizaji ka mudava kuchh to ho

dagh-e-dil zaḳhm-e-nazar soz-e-jigar fikr-e-hayat

ham tahi-daman sahi nazr-e-tamanna kuchh to ho

rahguzar viran hai har hadisa ḳhamosh hai

ai dil-e-iza-talab bahr-e-tamasha kuchh to ho

zindagi phir apne mustaqbil se ghafil kyon hui

saghar-e-imroz men sahba-e-farda kuchh to ho

ham kisi ehsas se ḳhamosh hain un ke huzur

vo ba-zid hain ham se tashrih-e-tamanna kuchh to ho

be-talab kaise mile kyun-kar mile husn-e-talab

zindagi ke honT par aḳhir taqaza kuchh to ho

kis qadar mayus hai mera junun-e-be-karan

‘baḳht’ aḳhir vus.at-e-daman-e-sahra kuchh to ho