Naz Muzaffarabadi
itni shiddat bhi kya pyaas men thi
raat utri hui gilas men thi
us ka main mustanad havala tha
us ki ḳhushbu mire libas men thi
kha ga.i vo tiri dua ka asar
ik ra.unat jo iltimas men thi
chaplusi munafiqat sazish
ye sifat har kaniz-o-das men thi
ḳhauf taari tha shahar-yaron par
ḳhilqat-e-shahr bhi hiras men thi
us ki ankhon men paḌh raha tha main
sha.iri jo abhi qayas men thi
us ke chehre pe dekhta tha main
jam.iyyat jo iqtibas men thi
sha.iri thi ki koi raqqasa
is qadar muḳhtasar libas men thi
Leave a Reply