Hafeez Banarasi
gumrah kah ke pahle jo mujh se ḳhafa hue
aḳhir vo mere naqsh-e-qadam par fida hue
ab tak to zindagi se ta.aruf na tha koi
tum se mile to ziist se bhi ashna hue
aisa nahin ki dil hi muqabil nahin raha
tir-e-nigah-e-naz bhi aksar ḳhata hue
meri nazar ne tum ko jamal-e-ashna kiya
mujh ko dua.en do ki tum ik a.ina hue
kya hoga is se baḌh ke koi rabt-e-bahami
manzil hamari vo to ham un ka pata hue
ab kya bata.en kis ki nigahon ki den thi
vo mai ki jis ke piite hi ham parsa hue
sunta huun ik maqam-e-ziyarat hai aaj kal
vo zindagi ka moḌ jahan ham juda hue
vo aa ga.e dava-e-gham-e-jan liye hue
lo aaj ham bhi qa.il-e-dast-e-dua hue
kab zindagi ne ham ko navaza nahin ‘hafiz’
kab ham pe bab-e-lutf-o-inayat na va hue
Leave a Reply