thakan se duur har ik manzil-e-hayat rahe
tira ḳhayal safar men jo saath saath rahe
miTa diya unhen ḳhud vaqt ke taqazon ne
jo log vaqt ke marhun-e-iltifat rahe
har ek hadsa-e-zist se guzar jaa.en
hamare haath men jo zindagi ka haath rahe
jo apni zaat men dariya bhi the samundar bhi
lab-e-furat vahi tishna-e-furat rahe
vo ajnabi ki tarah aaj ham se milte hain
tamam umr jo ‘ḳhusrav’ hamare saath rahe
Leave a Reply