Thakan Se Dur Har Ek Manzil-E-Hayat Rahe

thakan se duur har ik manzil-e-hayāt rahe

tirā ḳhayāl safar meñ jo saath saath rahe

miTā diyā unheñ ḳhud vaqt ke taqāzoñ ne

jo log vaqt ke marhūn-e-iltifāt rahe

har ek hādsa-e-zīst se guzar jaa.eñ

hamāre haath meñ jo zindagī kā haath rahe

jo apnī zaat meñ dariyā bhī the samundar bhī

lab-e-furāt vahī tishna-e-furāt rahe

vo ajnabī kī tarah aaj ham se milte haiñ

tamām umr jo ‘ḳhusrav’ hamāre saath rahe

Leave a Comment