malal hote hue dil pe kuchh malal nahin
ḳhayal-e-dost se achchha koi ḳhayal nahin
jise zaval na ho vo koi kamal nahin
kamal-e-gham ko hamare magar zaval nahin
jafa.en kar ke jo vo sust sust baiThe hain
unhen malal ye hai mujh ko kuchh malal nahin
ye kya nahin nigah-e-fitna-saz teri kami
hamare jazba-e-gham men ab ishti.al nahin
kaho ghamon se ki be-fikr ab dilon men rahen
ḳhushi ka aaj ki duniya men ehtimal nahin
ye aur baat taras hi na ho kisi dil men
chhupa hua to zamane se mera haal nahin
giri jo barq to apna bana raha hai mujhe
ye kya hai ‘ashk’ agar baghban ki chaal nahin
Leave a Reply