rahbar-e-qaum samajh le ye haqiqat hai baḌi
qaum chhoTi hai magar is ki rivayat hai baḌi
chadar-o-qamat-e-faruq pe rakhte hain nazar
ehtisab un ka kaḌa aur ita.at hai baḌi
rahbar badla to phir se safar aghaz hua
dasht-e-gum-rah men is taur masafat hai baḌi
kya idare the jo TuuTe hain ana ki ḳhatir
un ki tafsil na puchho ye hikayat hai baḌi
aaj bhi husn-e-bayan parda-e-amal bana
aaj ke daur men bhi harf ki taqat hai baḌi
ahl-e-dil teri vafaon ki qasam khate hain
bar-sar-e-ku-e-jafa bhi tiri shohrat hai baḌi
dard ki mauj ubharti hai tire naam ke saath
duriyan laakh sahi pyaar ki qurbat hai baḌi
Leave a Reply