Shaghil Adeeb
aks-e-ranj-o-malal hain ham log
zindagi ka ma.aal hain ham log
gaah saada fasana hain hamdam
gaah rangin-ḳhayal hain ham log
saz-e-mazi rabab-e-farda kabhi
aur kabhi chang-e-hal hain ham log
jis ka ab tak javab ban na paḌa
ek aisa saval hain ham log
dukh jhapaTte hain ham pe yuun jaise
ik ghanimat ka maal hain ham log
piite hain zahr-e-ashk jiite hain
azm-o-dam ka kamal hain ham log
dahr ko jo ata kare masti
haan vahi mast-hal hain ham log
tar-o-tira ho bazm apni kyon
sham.a-e-raushan-ḳhayal hain ham log
hai mata-e-hayat gham tera
sahab-e-jah-o-mal hain ham log
ham se chamkegi bazm-e-fan har shab
mahtab-e-kamal hain ham log
ye ta.alli nahin hai sach ‘shaghil’
sha.iri ka kamal hain ham log
Leave a Reply