kya hua koi sochta bhi nahin
aur kahne ko kuchh hua bhi nahin
jaise gum ho ga.i shanaḳht miri
ab koi mujh ko DhunDhta bhi nahin
jis se rahne lage gile mujh ko
vo abhi mujh ko janta bhi nahin
aisa ḳhamosh bhi nahin lagta
aur kuchh munh se bolta bhi nahin
chahta hai javab bhi saare
aur kuchh mujh se puchhta bhi nahin
mustarad bhi kabhi nahin karta
vo miri baat manta bhi nahin
daad deta hai jitne pe mujhe
aur kabhi mujh se harta bhi nahin
ḳhvab tak mere chhin leta hai
aur kuchh mujh se mangta bhi nahin
us taraf sab charagh jalte hain
jis taraf koi rasta bhi nahin
raat din par muhit hai to rahe
raushni koi chahta bhi nahin
Dubte aftab ki janib
der tak koi dekhta bhi nahin
Leave a Reply