baiTh kar paas na arman-bhara dil dekha
ik nazar duur se hi us ne ba-mushkil dekha
aa.ina dekh ke ḳhud ho gaya bismil dekha
ham ne to aks ko qatil ke bhi qatil dekha
hijr men jiina to be-shak hai nihayat dushvar
ishq men aur koi kaam na mushkil dekha
jaan mangi thi kaha ham ne ki tum par hai nisar
us pe kahte ho ki bas ja bhi tira dil dekha
main samajhta huun use apni mohabbat ki kashish
tu ne munh pher ke bhi mujh ko jo qatil dekha
aap ki yaad se main to kabhi ghafil na raha
aap kahte hain tujhe ḳhvab men ghafil dekha
bistar-e-gul pe jise dekha tha sote kal tak
aaj us nuur ke putle ko tah-e-gul dekha
shaan allah ki gulshan men nazar aa.i hamen
kabhi ghunche pe nazar Daali kabhi dil dekha
umr-bhar ḳhaak uḌata raha sahra ki magar
umr-bhar qais ne laila ka na mahmil dekha
mil gaya ḳhaak men ḳhud un ki hifazat ke liye
shauq-o-arman ka muhafiz tujhe ai dil dekha
bhar diya gauhar-e-nayab se ashkon ne mire
ḳhali phaila hua jab daman-e-sahil dekha
ham sunane lage qissa use apna ‘shankar’
ghair ke zikr se jis dam use ghafil dekha
Leave a Reply