Sabahat Urooj
ziist mahv-e-sahab ho jaise
mujh men tera shabab ho jaise
is aqidat se chup hi rahte hain
teri sunna savab ho jaise
rakh ke sar pe gali men bechi hai
ye mohabbat azaab ho jaise
us ki nazron men der tak dekha
meri ankhon ka ḳhvab ho jaise
tere dar pe sukun nahin milta
meri niyyat ḳharab ho jaise
us ke ḳhat ko sanbhal rakkha hai
ik muqaddas kitab ho jaise
aise rakha raha kitabon men
husn us ka gulab ho jaise
justuju ki ye maut hai sahab
tera milna sarab ho jaise
Leave a Reply