ishq ki Tisen jo mizrab-e-rag-e-jan ho ga.iin
ruuh ki mad.hosh bedari ka saman ho ga.iin
pyaar ki miThi nazar se tu ne jab dekha mujhe
talḳhiyan sab zindagi ki lutf-e-saman ho ga.iin
ab lab-e-rangin pe nurin muskurahaT kya kahun
bijliyan goya shafaq-zaron men raqsan ho ga.iin
majra-e-shauq ki be-bakiyan un par nisar
haa.e vo ankhen jo zabt-e-gham men giryan ho ga.iin
chha ga.iin dushvariyon par meri sahl-angariyan
mushkilon ka ik ḳhayal aaya ki asan ho ga.iin
Leave a Reply