afzal-ahmad-syed

Shairi Maine Ijad Ki

kaghaz marakashiyon ne ijad kiya

huruf fonishiyon ne

shairi main ne ijad ki

qabr khodne vaale ne tandur ijad kiya

tandur par qabza karne valon ne roti ki parchi banai

roti lene valon ne qatar ijad ki

aur mil kar gaana sikha

roti ki qatar men jab chyuntiyan bhi aa kar khadi ho gaiin

to faaqa ijad ho gaya

shahtut bechne vaale ne resham ka kiida ijad kiya

shairi ne resham se ladkiyon ke liye libas banaya

resham men malbus ladkiyon ke liye kutniyon ne mahal-sara ijad ki

jahan ja kar unhon ne resham ke kiide ka pata bata diya

fasle ne ghode ke chaar paanv ijad kiye

tez-raftari ne rath banaya

aur jab shikast ijad hui

to mujhe tez-raftar rath ke aage lita diya gaya

magar us vaqt tak shairi mohabbat ko ijad kar chuki thi

mohabbat ne dil ijad kiya

dil ne khema aur kashtiyan banain

aur dur-daraz ke maqamat tai kiye

khvaja-sara ne machhli pakadne ka kanta ijad kiya

aur soe hue dil men chubho kar bhaag gaya

dil men chubhe hue kante ki Dor thamne ke liye

nilami ijad hui

aur

jabr ne akhiri boli ijad ki

main ne saari shairi bech kar aag kharidi

aur jabr ka haath jala diya

More Poems

Leave a Comment