Azra Abbas
tumhen yaad hai
mohabbat ki akhiri rusumat ke dauran
tanhai ke ek jangal men
main ne tumhen mohabbat ka akhiri tohfa bhi diya tha
mere kunvare-pan ki khushbu
tumhare pasine men gundh gai thi
vo shaam
pahle bose se shurua
hui thi
aur andhere ki nazr ho gai thi
lekin mohabbat
be-sakhtagi ke is vaar par
khush thi
mohabbat apni jiit ka jashn mana rahi thi
kya ye yaad tumhare liye
ek tohfa nahin hai
jo us din tumhen mila thaa…
Leave a Reply