ḳhvab to ḳhvab hai ta.abir badal jaati hai
dil ke a.ine men tasvir badal jaati hai
ab salibon pe kahan gul-shuda sham.on ki qatar
aan ki aan men tahrir badal jaati hai
sur to badle hain na badlenge magar vaqt ke saath
zulm ke haath men shamshir badal jaati hai
roz banta hai koi aag ke tiron ka hadaf
ret par ḳhuun ki zanjir badal jaati hai
dil ke patthar ki lakiren to nahin miT saktin
kashish-e-zulf-e-girah-gir badal jaati hai
tinka tinka hai qafas bhi to nasheman ki tarah
haan faqat hasrat-e-tamir badal jaati hai
in havaon men ho dil kis ka nishana ‘tanvir’
jab bhi dekho ravish-e-tir badal jaati hai
Leave a Reply