sauda-mohammad-rafi

Gada Dast-E-Ahl-E-Karam Dekhte Hain

gada dast-e-ahl-e-karam dekhte hain

ham apna hi dam aur qadam dekhte hain

na dekha jo kuchh jaam men jam ne apne

so yak qatra-e-mai men ham dekhte hain

ye ranjish men ham ko hai be-ikhtiyari

tujhe teri kha kar qasam dekhte hain

gharaz kufr se kuchh na diin se hai matlab

tamasha-e-dair-o-haram dekhte hain

hubab-e-lab-e-ju hain ai baghban ham

chaman ko tire koi dam dekhte hain

navishte ko mere mitate hain ro ro

malaek jo lauh o qalam dekhte hain

mita jaae hai harf harf ansuon se

jo naama use kar raqam dekhte hain

akad se nahin kaam sumbul ki ham ko

kisi zulf ka pech o kham dekhte hain

khuda dushmanon ko na vo kuchh dikhae

jo kuchh dost se apne ham dekhte hain

sitam se kiya tu ne ham ko jo khugar

karam se tire ham sitam dekhte hain

magar tujh se ranjida-khatir hai ‘sauda’

use tere kuche men kam dekhte hain

More Poems

Leave a Comment