harf ke phuul chun ke laate the
roz taaza ghazal sunate the
dard ki suraton men ik ghar tha
us ki viraniyan sajate the
zindagi diary men likhte the
aur phir diary jalate the
ik shajar tha jo us ke jaisa tha
us ko ham hal-e-dil sunate the
ab andhere men baiThe rahte hain
pahle aksar diye jalate the
us ke lahje ki zad men aate hi
kanch ke ḳhvab TuuT jaate the
zindagi ki gali men bhi kuchh log
maut ka giit gungunate the
apne gham se kashid kar ke hansi
ḳhud hi apna fareb khate the
be-niyazi bhi ek ne.amat thi
yaad karte hi bhuul jaate the
ansuon men bhigo ke rakhte the
phuul to phir bhi suukh jaate the
zindagi se kabhi mili ho ‘sahar’
kuchh bulave to tum ko aate the
Leave a Reply