Bashir Badr Ki Ghazlen Suna Raha Tha Main

bashir ‘badr’ ki ghazlen suna raha tha main

kal asman ko zamin par bula raha tha main

guzar raha tha main jab mai-kade ki rahon se

jigar ke haath se daman bacha raha tha main

ye baat sab ko bata.i thi mirza ghalib ne

bahar ghar men thi sahra uḌa raha tha main

tumhari yaad bhi chupke se aa ke baiTh ga.i

ghazal jo ‘mir’ ki ik gunguna raha tha main

udaas shaam nazar aa.i jaan ke jaisi

jab intizar men tere khaḌa raha tha main

vo amrita ki tarah mujh se ishq karti thi

so apne aap ko ‘sahir’ bata raha tha main

‘faraz’-o-‘faiz’ ke dilkash kalam ko paḌh kar

mohabbaton ka tariqa sikha raha tha main

‘majaz’ kaan men mere bata ga.e aa kar

ki kaise husn ko pagal bana raha tha main

‘shakil’ aazmi kahne lage paron ko khol

jo su-e-asman sar ko uTha raha tha main

ye baton baton men mujh ko bata ga.e ‘tanvir’

kal us ke haath ka kangan ghuma raha tha main

‘nida’ ne shahr men gaanv basa ke rakha tha

so un se milne usi gaanv ja raha tha main

lipaT ke rone lage mujh se sha.ir-e-mashriq

jab un ko qaum ki halat bata raha tha main

‘zafar’ bata.enge tum ko ya main bata.unga

ke mulk chhoḌ ke kis tarah ja raha tha main

ajab hi ḳhvab dikha.i diya mujhe ‘mohsin’

kal aftab ki mayyat uTha raha tha main