koi arman talash-e-dost ka kyuun dil men rah jaata
ghubar apna agar gard-e-rah-e-manzil men rah jaata
nahin maalum kis muddat se khanjar tishna-e-khun tha
koi khatra lahu ka kyuun tan-e-bismil men rah jaata
safai kab thi mumkin ye ghubar-e-dil vo kafir hai
mire dil se nikalta bhi to us ke dil men rah jaata
jala aur jal ke soz-e-rashk se dil bujh gaya fauran
agar hota charagh-o-shama us mahfil men rah jaata
taassuf hai ghubar-e-qais ki parvaz-e-hasrat par
lipat kar kaash thoda parda-e-mahmil men rah jaata
na deta gar sahara kuchh umid-e-vasl ka tufan
shanavar bahr-e-gham ka hasrat-e-sahil men rah jaata
is aine men gar vo dekh lete ru-e-anvar ko
to kyuun itna bada dhabba mah-e-kamil men rah jaata
na milta muddaa-e-dil diram milta jo munim se
magar ik daagh ban kar vo kaf-e-sail men rah jaata
nishan us ka kahin milta suragh us ka kahin lagta
to apna paanv kyuun thak kar rah-e-manzil men rah jaata
‘nazar’ ham ko ilaqa sher se kya par ye hasrat hai
na rahte ham to apna zikr us mahfil men rah jaata