Hashim Raza Jalalpuri
chamakte bujhte sitaron ke saath kaTte hain
is ehtimam se ham apni raat kaTte hain
miri zaban ki qimat lagane vaale log
mujhe ḳharid na paa.e to baat kaTte hain
hazaron saal se zulm-o-sitam ke parvarda
mosafiran-e-mohabbat ke haath kaTte hain
saval bai’at-e-ab-e-furat uThte hi
asa-e-tishna-labi se furat kaTte hain
usi ka naam sahara hai dukh ke maron ka
usi ke naam se ham hadsat kaTte hain
hamari qadr karo ham hain sha.iran-e-junun
qalam ki nok se fasl-e-hayat kaTte hain
Leave a Reply