jab ḳhvahish-e-duniya se koi kaam nahin hai
kyuun phir dil-e-shorida ko aram nahin hai
shamil yahan isbat men pahlu-e-nafi hai
kamil kisi aghaz ka anjam nahin hai
vo dhuup hai ankhon men ki jal jaati hai har shaam
manzar hai dhuan koi lab-e-bam nahin hai
kya tarz-e-rifaqat hai ki milte hain ba-sad-shauq
par zikr-e-shanasa.i-o-paigham nahin hai
tang-zarfi-e-hayyat jise kahte hain ghazal ki
afaq-e-ma.ani hai vo ib.ham nahin hai
Leave a Reply