hadsat ab ke safar men na.e Dhab se aa.e
kashtiyan bhi nahin Duubi na kinare aa.e
ba.ad muddat ye jila kis ke hunar ne baḳhshi
ba.ad muddat mire a.ine men chehre aa.e
ashk palkon ki munDeron pe tamanna dil men
din Dhale lauT ke shaḳhon pe parinde aa.e
saare kirdaron se ji khol ke baten kar luun
moḌ kaisa mire qisse men na jaane aa.e
arsh par roz bagule se phira karte hain
dasht ki ḳhaak ko divane kahan le aa.e
main kisi aur taqaze se karun zikr us ka
vo kisi aur se milne ke bahane aa.e
Leave a Reply