gali gali miri vahshat liye phire hai mujhe
ki sang-o-ḳhisht ki lazzat liye phire hai mujhe
na koi manzil-e-maqsud hai na rah-e-talab
bhaTakte rahne ki aadat liye phire hai mujhe
na mal-o-zar ki tamanna na zindagi ki havas
na jaane kaun si quvvat liye phire hai mujhe
haram se dair talak dair se haram ki taraf
na jaane kis ki aqidat liye phire hai mujhe
ye mufsidon ka jahan ye tazad ki duniya
bas ek harf-e-mohabbat liye phire hai mujhe
mujhe kiya miri fikr-e-rasa ne avara
ki dar-ba-dar miri shohrat liye phire hai mujhe
jo bas chale na uThun tere astane se
ye sar-phira jo hai ‘rif.at’ liye phire hai mujhe
Leave a Reply