Mushkilen Khaal Khaal Chahte Hain

mushkileñ ḳhaal ḳhaal chāhte haiñ

shauq meñ e’tidāl chāhte haiñ

kaT ke apnī jaḌoñ se kuchh paude

sabz mausam kī shaal chāhte haiñ

kam se kam ḳhud se to haiñ muḳhlis vo

jo hameñ hasb-e-hāl chāhte haiñ

laakh jiinā harām ho ham par

ham to rizq-e-halāl chāhte haiñ

kyā kamī aa ga.ī hai chāhat meñ

zaḳhm kyuuñ indimāl chāhte haiñ

aañkh pathrā ga.ī hai ro ro kar

ashk apnā nikāl chāhte haiñ

chand lamhāt surḳh-rūī ke

kitne hī māh-o-sāl chāhte haiñ

ghar ke jalve ‘nadīm’ kam to nahīñ

ik zarā dekh-bhāl chāhte haiñ

Leave a Comment