mushkilen ḳhaal ḳhaal chahte hain
shauq men e’tidal chahte hain
kaT ke apni jaḌon se kuchh paude
sabz mausam ki shaal chahte hain
kam se kam ḳhud se to hain muḳhlis vo
jo hamen hasb-e-hal chahte hain
laakh jiina haram ho ham par
ham to rizq-e-halal chahte hain
kya kami aa ga.i hai chahat men
zaḳhm kyuun indimal chahte hain
aankh pathra ga.i hai ro ro kar
ashk apna nikal chahte hain
chand lamhat surḳh-rui ke
kitne hi mah-o-sal chahte hain
ghar ke jalve ‘nadim’ kam to nahin
ik zara dekh-bhal chahte hain
Leave a Reply