Badiuzzaman Khawar
jise bhi dekhiye pyasa dikha.i deta hai
koi maqam ho sahra dikha.i deta hai
na jaane kaun hai vo vaqt-e-sham jo akasr
gali ke moḌ pe baiTha dikha.i deta hai
jo chandni men nahate hue bhi Darta tha
vo jism dhuup men jalta dikha.i deta hai
pahunch rahi hai jahan tak nigah saḌkon par
na koi peḌ na saaya dikha.i deta hai
kanar-e-ab na baiTho ki jhiil men ‘ḳhavar’
tumhara aks bhi ulTa dikha.i deta hai
Leave a Reply