Ameeq Hanafi
ham ki jo baiThe hue hain apne sar pakḌe hue
aap hi zanjir hain aur aap hi jakḌe hue
shaam piili raakh men ḳhun-e-shafaq ka injimad
raat jaise ḳhvab-e-yaḳh-basta hon din akḌe hue
rang ke pahre hain ruḳhsaron ki ab-o-tab par
aur rangon ko hain zulfon ki laTen jakḌe hue
dhuup ne naḳhun Dubo.e hain gulon ke ḳhuun men
zaḳhm-ḳhurda ḳhushbuen phirti hain sar pakḌe hue
raat kaali raat peḌon ko hilati andhiyan
aur ham baiThe tanab-e-ḳhvab hain pakḌe hue
Leave a Reply