Hum Ki Jo baiThe Hue Hain Apne Sar pakDe Hue

ham ki jo baiThe hue haiñ apne sar pakḌe hue

aap hī zanjīr haiñ aur aap hī jakḌe hue

shaam piilī raakh meñ ḳhūn-e-shafaq kā injimād

raat jaise ḳhvāb-e-yaḳh-basta hoñ din akḌe hue

rañg ke pahre haiñ ruḳhsāroñ kī āb-o-tāb par

aur rañgoñ ko haiñ zulfoñ kī laTeñ jakḌe hue

dhuup ne nāḳhun Dubo.e haiñ guloñ ke ḳhuun meñ

zaḳhm-ḳhurda ḳhushbueñ phirtī haiñ sar pakḌe hue

raat kaalī raat peḌoñ ko hilātī āñdhiyāñ

aur ham baiThe tanāb-e-ḳhvāb haiñ pakḌe hue

Leave a Comment