Tishnagi Dil Ki Bujhana to KHabar Kar Dena

Mansoor Usmani

tishnagi dil ki bujhana to ḳhabar kar dena

ashk ankhon men chhupana to ḳhabar kar dena

ham ne kuchh giit likhe hain jo sunana hain tumhen

tum kabhi bazm sajana to ḳhabar kar dena

hadse rah-e-mohabbat ka muqaddar Thahre

jab hamen dil se bhulana to ḳhabar kar dena

jin kitabon men chhupa.e hain mire ḳhat tum ne

un kitabon ko jalana to ḳhabar kar dena

aaj begana samajhte ho to samjho lekin

jab sata.e ye zamana to ḳhabar kar dena

main zarur a.unga ‘mansur’ tumhari ḳhatir

tum jo maqtal ko sajana to ḳhabar kar dena