Taimur Hasan
bahar aane ki ummid ke ḳhumar men tha
ḳhizan ke daur men bhi mausam-e-bahar men tha
jise sunane gaya tha main zindagi ki navid
vo shaḳhs aḳhiri hichki ke intizar men tha
sipah-e-aql-o-ḳhirad mujh pe hamla-avar thi
magar main ishq ke mazbut-tar hisar men tha
mira nasib chamakta bhi kis tarah aḳhir
mira sitara kisi dusre madar men tha
uTha ke haath dua mangna hi baaqi hai
vagarna kar chuka sab kuchh jo iḳhtiyar men tha
use to is liye chhoḌa tha vo nihatta hai
ḳhabar na thi ki vo mauqe ke intizar men tha
vo kah raha tha mujhe naaz apne ijz pe hai
ajab tarah ka ghurur us ke inkisar men tha
Leave a Reply