Shohrat Bukhari
dil talabgar-e-tamasha kyuun tha
ya.ani hasrat-kash-e-duniya kyuun tha
din bahr-e-hal guzar hi jaate
dil ka ehsan uThaya kyuun tha
saḳht begana tha lekin ya-rab
itna manus vo chehra kyuun tha
juz ghazal ḳhaak tha daman men mire
us ne phir pyaar se dekha kyuun tha
vo agar meri rasa.i men na tha
a.ine men koi vaisa kyuun tha
aankh ko shauq ki dekhe us ko
dil ka pachhtava ki dekha kyuun tha
hasil-e-bazm hai parvane ki raakh
raat bhar sham.a ka charcha kyuun tha
sub.h ke naam se ghabrata huun
ji ko raas aaya andhera kyuun tha
sohbat-e-gul-badnan men ‘shohrat’
dil men kanTa sa khaTakta kyuun tha
Leave a Reply