Poet
ai mujhe ‘mir’ ke ash.ar sunane vaale
jaag uTThe hain ka.i dard purane vaale
mujh ko tanha.i men yuun chhoḌ ke jaata kyuun hai
teri janib hain ka.i qarz chukane vaale
ye bata hijr ke mausam ka mudava kya hai
mujh ko andaz mohabbat ke sikhane vaale
ishq valon se hasab aur nasab puchhte ho
log hain ye to miyan unche gharane vaale
varna sahra ki na yuun ḳhaak uḌaa.i hoti
tu ne dekhe hi nahin saanp ḳhazane vaale
dil ki manzil ka hai aghaz vahan se ‘asif’
lauT aate hain jahan se ye zamane vaale
Leave a Reply