ab khayalon ka jahan aur na abad karen
khvab jo bhuul chuke hain unhen bas yaad karen
thapki de de ke sulane ki hai aadat dil ko
ab kisi aur se kyuun khud hi se fariyad karen
kitne mausam ke chhalave se guzar kar pahunchi
us dagar pe ki jahan log mujhe yaad karen
ham bhi ab fikr-e-jahan chhod ke ji bhar hans len
vaqt itna bhi kahan hai jise barbad karen
zindagi yuun hi munazzam rahe aisa bhi nahin
ham nai tarz koi aur bhi ijad karen
dene vaale ki mashiyyat thi jo vahshat de di
dil-e-viran jo mila hai use abad karen
dil ke tuute hue tukdon ko na joden ‘shahin’
dil pe jo guzri use bhuul ke mat yaad karen