Jab Hue Tum Chaman Mein Aan Khade

jab hue tum chaman men aan khade

vohin ho gae gulon ke kaan khade

shukr-e-gham hai ki dil ke maidan men

aah o naale ke hain nishan khade

baithne ki nahin rahi taqat

hoven kya ham se na-tavan khade

us talak bal-e-shauq le pahuncha

rah gae dar pe darban khade

us ke tir-e-nigah ki daulat

hain dar-e-dil pe mehman khade

be-sabab ham se ruthe jaate ho

sun lo tuk ho ke mehrban khade

diin o iman o jaan dene ko

ham to hain ru-ba-ru har aan khade

aaj vo imtihan le ‘joshish’

ham bhi hain bahr-e-imtihan khade

Leave a Comment