Ahmed Nisar
gham ka pahad mom ke jaise pighal gaya
ik aag le ke ashkon ki surat nikal gaya
khush-fahmiyon ko soch ke main bhi machal gaya
jaise khilauna dekh ke bachcha bahal gaya
kal tak to khelta tha vo shoalon se aag se
na jaane aaj kaise vo paani se jal gaya
jhulse badan ko dekh ke katra raha hai vo
jis ke main ghar ki aag bujhane men jal gaya
barish hui ghamon ki to ankhon ki siip men
aansu ka qatra palkon se girte sambhal gaya
vaise sabhi to ziist se daman bacha liye
vo kaun hai jo maut se bach kar nikal gaya
taqdir so na jaae kahin jagiye zara
dekho taraqqiyon ka bhi suraj nikal gaya
gar ho sake to aap bhi badlo miyan ‘nisar’
kahna pade na ye ki zamana badal gaya
Leave a Reply