chhupi dil men jo yad-e-yar hogi
masafat aur bhi dushvar hogi
ḳhabar kya thi ki haa.il raste men
pas-e-divar bhi divar hogi
gila inkar ka us se karun kya
koi to surat-e-inkar hogi
use jab manna kuchh bhi nahin hai
dalalat bhi miri be-kar hogi
mujhe ma.alum hi kab tha ye pahle
ḳhirad ḳhud hi junun-asar hogi
sar-e-mahfil miri atish-bayani
kisi ka sho.ala-e-ruḳhsar hogi
vo gul mahkega jab dil ke chaman men
miri har saans ḳhushbu-dar hogi
ghurur-e-sar-bulandi kya ki ik din
na sar hoga na ye dastar hogi
miri ḳhak-e-badan ik roz ‘shahid’
bara.e kucha-e-dildar hogi
Leave a Reply