ham samajhte hain azmane ko
uzr kuchh chahiye satane ko
sang-e-dar se tire nikali aag
ham ne dushman ka ghar jalane ko
subh-e-ishrat hai vo na sham-e-visal
haae kya ho gaya zamane ko
bul-havas roe mere girye pe ab
munh kahan tere muskurane ko
barq ka asman par hai dimagh
phunk kar mere ashiyane ko
sang-e-sauda junun men lete hain
apna ham maqbara banane ko
shikva hai ghair ki kudurat ka
so mire khaak men milane ko
roz-e-mahshar bhi hosh gar aaya
jaenge ham sharab-khane ko
sun ke vasf us pe mar gaya hamdam
khuub aaya tha gham uthane ko
koi din ham jahan men baithe hain
asman ke sitam uthane ko
naqsh-e-pa-e-raqib ki mehrab
nahin zebinda sar jhukane ko
chal ke kaabe men sajda kar ‘momin’
chhod us but ke astane ko
Leave a Reply