Harim-E-Zat Ki Har Rut Manae Mere Liye

Mohammad Naim Jawed Naim

harim-e-zat ki har rut mana.e mere liye

vo ro.e mere liye muskura.e mere liye

zamana us ko hamesha laga.e zaḳhm pe zaḳhm

zamana us ko hamesha sata.e mere liye

main shahar chhoḌ ke jaane ki jab bhi baat karun

vo haath joḌ ke mujh ko mana.e mere liye

use kaho hai mohabbat men shirk kufr-e-azim

vo apna aap bhi ab bhuul jaa.e mere liye

qadam qadam pe jalata rahun lahu ke charagh

qadam qadam pe vo maqtal saja.e mere liye

usi ko shauq tha sab se mujhe milane ka

ab apni aankh ka kajal baha.e mere liye

‘na.im’ us ko zarurat miri kabhi na paḌe

vo milne aa.e mujhe to bas aa.e mere liye