Zafar Iqbal Zafar
jis roz se apna mujhe idrak hua hai
har lamha miri ziist ka saffak hua hai
ghar se to nikal aa.e ho socha nahin kuchh bhi
ab soch rahe ho jo badan chaak hua hai
tahzib hi baaqi hai na ab sharm-o-haya kuchh
kis darja ab insan ye bebak hua hai
guzra hai koi saneha basti men hamari
har shaḳhs ka chehra yahan ghamnak hua hai
uftad zamane ki paḌi aisi hai mujh par
tha jo bhi asasa ḳhas-o-ḳhashak hua hai
andhi thi vo nafrat ki ki insan tha andha
hain sho.ale uThe aise ki sab ḳhaak hua hai
aslaf ke aqdar ko apnaya hai jis ne
pasti men raha phir bhi vo aflak hua hai
rakha hai qadam jis ne siyasat ke safar par
vo shaḳhs ‘zafar’ sahab-e-imlak hua hai
Leave a Reply