Jis Rose Se Apna Mujhe Idrak Hua Hai

jis roz se apnā mujhe idrāk huā hai

har lamha mirī ziist kā saffāk huā hai

ghar se to nikal aa.e ho sochā nahīñ kuchh bhī

ab soch rahe ho jo badan chaak huā hai

tahzīb hī baaqī hai na ab sharm-o-hayā kuchh

kis darja ab insān ye bebāk huā hai

guzrā hai koī sāneha bastī meñ hamārī

har shaḳhs kā chehra yahāñ ġhamnāk huā hai

uftād zamāne kī paḌī aisī hai mujh par

thā jo bhī asāsa ḳhas-o-ḳhāshāk huā hai

āñdhī thī vo nafrat kī ki insāñ thā andhā

haiñ sho.ale uThe aise ki sab ḳhaak huā hai

aslāf ke aqdār ko apnāyā hai jis ne

pastī meñ rahā phir bhī vo aflāk huā hai

rakhā hai qadam jis ne siyāsat ke safar par

vo shaḳhs ‘zafar’ sāhab-e-imlāk huā hai

Leave a Comment