gham-ha-e-mohabbat ka asar dekh raha huun
bikhre hue daman pe guhar dekh raha huun
ai husn-e-ruḳh-e-yar jidhar dekh raha huun
ik hasb-e-taḳhayyul o nazar dekh raha huun
ik nuur ki duniya hai miri shauq ki manzil
har zarre ko ḳhurshid-e-nazar dekh raha huun
tum aur abhi husn ke pardon ko uThao
main aaj had-e-tab-e-nazar dekh raha huun
har aah sharar-ḳhez hai murghan-e-qafas ki
daman-e-fughan sho.ala-asar dekh raha huun
yuun kakul-o-ruḳh apne tasavvur men hain ‘jumbish’
ik marhala-e-sham-o-sahar dekh raha huun
Leave a Reply