chhup ke us ne jo khud-numai ki
intiha thi ye dilrubai ki
mail-e-ghamza hai vo chashm-e-siyah
ab nahin khair parsai ki
ham se kyunkar vo astana chhute
muddaton jis pe jabha-sai ki
dil ne barson ba-justuju-e-kamal
kucha-e-ishq men gadai ki
daam se un ke chhutna to kahan
yaan havas bhi nahin rihai ki
kya kiya ye ki ahl-e-shauq ke saath
tu ne ki bhi to bevafai ki
ho ke nadim vo baithe hain khamosh
sulh men shaan hai ladai ki
us taghaful-shiar se ‘hasrat’
ham men taqat nahin judai ki
Leave a Reply