kahte hain log yaar ka abru phadak gaya
tegha sa kuchh nazar men hamari sadak gaya
main kya karun ada-e-ghazab-nak ka bayan
bijli sa mere samne aa kar kadak gaya
naale se mere gul to hua chaak pairahan
bulbul tira jigar na ye sun kar tadak gaya
koi gaya na khauf se qatil ke samne
main hi tha us ke ru-ba-ru jo be-dhadak gaya
mushkil padega phir to bujhana jahan ka
jo tuk ziyada ishq ka shoala bhadak gaya
‘sauda’ chura chuka hi tha gulshan men gul ko main
qismat ko apni kya kahun patta khadak gaya
Leave a Reply