Suroor Barabankvi
mehr-o-mah bhi larzan hain faza ki banhon men
ahl-e-dil ḳhiraman hain kaisi shah-rahon men
be-kasi barasti hai zindagi ke chehre se
ka.enat ki sansen Dhal rahi hain aahon men
zabt-e-gham ki takiden thiin so ḳhair thiin lekin
kuchh talafiyan bhi thiin raat un nigahon men
ham tujhe bhula kar bhi kya sukun pa.enge
zindagi to hai tere dard ki panahon men
dasht-e-dil men ab teri yaad yuun bhaTakti hai
jaise koi divana shab ko shah-rahon men
muddaten huiin us ne aankh bhar ke dekha tha
phir rahi hain vo ankhen aaj tak nigahon men
Leave a Reply