Ashfaq Nasir
piila tha chand aur shajar be-libas the
tujh se bichhaḌ ke gaanv men saare udaas the
socha to tu magan tha faqat meri zaat men
dekha to kitne log tire as-pas the
jab ham na mil sake to hamen manna paḌa
basti ke log kitne sitara-shanas the
dil is pe mutma.in tha ki ham ek ho ga.e
lekin ka.i guman miri sochon ke paas the
vo phuul ho sitara ho shabnam ho jhiil ho
teri kitab-e-husn ke sab iqtibas the
‘ashfaq’ us ko dekh ke ham se ghazal hui
muddat se varna ham to yunhi mahv-e-yas the
Leave a Reply