Khalid Malik Sahil
kisi bhi raah pe rukna na faisla kar ke
bichhaḌ rahe ho miri jaan hausla kar ke
main intizar ki halat men rah nahin sakta
vo intiha bhi kare aaj ibtida kar ke
tiri juda.i ka manzar bayan nahin hoga
main apna saaya bhi rakkhun agar juda kar ke
mujhe to bahr-e-bala-ḳhez ki zarurat thi
simaT gaya huun main duniya ko rasta kar ke
kisi ḳhayal ka koi vajud ho shayad
badal raha huun main ḳhvabon ko tajraba kar ke
kabhi na faisla jaldi men kijiye ‘sahil’
badal bhi sakta hai kafir vo bad-dua kar ke
Leave a Reply