Poet
afsana-e-gham yuun bhi dil-e-zar kaha hai
ik baar jo puchha hai to sau baar kaha hai
jo baat tiri bazm men ham kah na sake the
us baat ko logon ne sar-e-dar kaha hai
mamnun hain us shoḳh ke ai bad-e-saba ham
phulon ki zabani jo hamen pyaar kaha hai
mumkin hai usi raah se manzil pe pahunch jaa.en
dil valon ne jis raah ko dushvar kaha hai
vo faḳhr-e-masiha hai magar ahl-e-ḳhirad ne
hairat hai use nargis-e-bimar kaha hai
arzan hui yuun jins-e-mohabbat ki jahan men
ham se tahi-daman ko ḳharidar kaha hai
Leave a Reply