agarche kahne ko kal kaenat apni thi
haqiqatan kahan apni bhi zaat apni thi
kahen to kis se kahen ham hayat apni thi
na koi din tha hamara na raat apni thi
koi bhi aaj to apna nazar nahin aata
jo tum the apne to kul kaenat apni thi
ye kya ki aaj koi naam tak nahin leta
vo din bhi the ki har ik lab pe baat apni thi
hamare paas raha kya hai ab ghamon ke siva
vo din gae ki rah-e-shash-jihat apni thi
hamin se bhuul kahin ho gai mohabbat men
vagarna vo nigah-e-iltifat apni thi
jo tum qarib the har shai pe ikhtiyar sa tha
ye chand aur sitaron ki raat apni thi
hamen khud apni khirad ka ghurur le duuba
nahin to ek zamane men baat apni thi
‘hayat’ is liye nazm-e-kuhan ko tod diya
ki aaj sirf isi men najat apni thi
Leave a Reply